நீங்கள் தேடியது "பிரதமர் வேட்பாளர்"

பாங்காக்:

தாய்லாந்தில் அடுத்த மாதம் (மார்ச்) 24-ந்தேதி நாடாளுமன்ற பொதுத்தேர்தல் நடக்கிறது. இதற்காக அங்குள்ள பிரதான கட்சிகள் தீவிர பிரசாரத்தில் ஈடுபட்டு உள்ளன. இதில் நாட்டின் பிரபல கட்சிகளில் ஒன்றான மகாசோன் கட்சி, பவுலின் காம்ப்ரிங் (வயது 52) என்ற திருநங்கையை பிரதமர் வேட்பாளராக நிறுத்தி உள்ளது. கடந்த 3 ஆண்டுக்கு முன்பு வரை பினித் காம்ப்ரிங் என்ற பெயரில் ஆணாக இருந்து 2 குழந்தைகளுக்கு தந்தையாகவும் இருந்த இவர், பத்திரிகையாளராகவும், தொழிலதிபராகவும் இருந்தார். கால்பந்து ரசிகர் கூட்டமைப்பை நிறுவி தாய்லாந்து விளையாட்டு துறையிலும் புகழ்பெற்று விளங்கினார். பின்னர் பாலின மாற்று அறுவை சிகிச்சை மூலம் பெண்ணாக மாறி தனது பெயரையும் பவுலின் என மாற்றிக்கொண்டார்.

தாய்லாந்து பிரதமர் தேர்தலில் 3 பிரதான வேட்பாளர்களில் ஒருவராகவும், முதல் திருநங்கை வேட்பாளராகவும் களமிறங்கி இருக்கும் பவுலின் காம்ப்ரிங் தனது பிரசாரத்தை தொடங்கி உள்ளார். தான் வெற்றி பெறவில்லை என்றாலும், அடுத்த தலைமுறையிலாவது திருநங்கை ஒருவர் நாட்டின் தலைவராக வருவார் என்று அவர் கூறினார். #Thailand #Transgender #PrimeMinister

பெங்களூரு:

பிரதமர் வேட்பாளராக அகில இந்திய காங்கிரஸ் தலைவர் ராகுல் காந்தியை ஆதரிப்பதாக தி.மு.க. தலைவர் மு.க.ஸ்டாலின் அறிவித்தார். இந்நிலையில் பிரதமர் வேட்பாளராக ராகுல் காந்திக்கு, கர்நாடக முதல்-மந்திரி குமாரசாமி ஆதரவு தெரிவித்துள்ளார்.

இதுகுறித்து அவர் அளித்த பேட்டியில் கூறியதாவது:-

நாடாளுமன்ற தேர்தலில் காங்கிரஸ் சார்பில் பிரதமர் வேட்பாளராக ராகுல் காந்தி அறிவிக்கப்பட்டால், அவரை நாங்கள் ஆதரிப்போம். இதற்கு எங்கள் கட்சியின் தேசிய தலைவர் தேவேகவுடாவும் ஒப்புதல் தெரிவித்துள்ளார்.

பா.ஜனதாவுக்கு எதிராக அனைத்து மாநில கட்சிகளும் ஒன்றுகூடி போராட வேண்டியது அவசியம். பிரதமர் பதவியை நிர்வகிக்கும் தகுதி, திறன் ராகுல் காந்திக்கு உள்ளது. பிரதமர் மோடிக்கு பலமான போட்டியாளர் ராகுல் காந்தி.

பிரதமர் மோடி வெறும் காகித புலி. கடந்த தேர்தலின்போது, மக்களுக்கு கொடுத்த எந்த வாக்குறுதியையும் அவர் நிறைவேற்றவில்லை. வெறும் வாய்ப்பேச்சால் நாட்டு மக்களின் கவனத்தை திசைதிருப்புகிறார்.

இவ்வாறு அவர் கூறினார். #Kumaraswamy #RahulGandhi

புதுடெல்லி:

பா.ஜனதா தலைமையிலான தேசிய ஜனநாயக கூட்டணியில் உள்ள சிவசேனா பிரதமர் நரேந்திர மோடியையும், பா.ஜனதாவையும் தொடர்ந்து விமர்சனம் செய்து வருகிறது.


இது தொடர்பாக அந்த கட்சியின் எம்.பி. சஞ்சய் ராவத் அளித்துள்ள பேட்டியில் கூறி இருப்பதாவது:-

இந்த பாராளுமன்ற தேர்தலில் பா.ஜனதாவுடன் சிவசேனா கூட்டணி வைக்காது. நாங்கள் அந்த கட்சியுடன் மிகவும் நெருக்கமாக இல்லை. 2014 தேர்தல் போல் பா.ஜனதாவுடன் எங்கள் உறவு இல்லை. பா.ஜனதாவுடன் கூட்டணி என்ற வார்த்தை இனி எங்கள் அகராதியில் கிடையாது.

இந்த தேர்தலில் தொங்கு பாராளுமன்றம் தான் உருவாகும். அப்படி உருவானால் பிரதமர் பதவிக்கு நிதின் கட்காரியை முன்னிறுத்த வேண்டும். அப்படி செய்தால் மட்டுமே நாங்கள் பா.ஜனதாவுக்கு ஆதரவு அளிப்போம். மோடியை முன்னிறுத்தினால் நாங்கள் ஆதரவு அளிக்க மாட்டோம்.

இவ்வாறு அவர் கூறினார்.

இந்த நிலையில் உத்தரபிரதேச மாநிலத்தில் தனித்து போட்டியிட போவதாக சிவசேனா அறிவித்தது. பா.ஜனதாவுடன் கூட்டணி இல்லை. 25 தொகுதியில் போட்டியிட போவதாகவும் தெரிவித்துள்ளது.

பா.ஜனதா அல்லாத சிறிய கட்சியுடன் கூட்டணி அமைத்து அந்த மாநிலத்தில் போட்டியிடுகிறது.

இந்த நிலையில் சிவசேனாவை சமாதானப்படுத்த கூட்டணி அமைக்கும் முயற்சியில் பா.ஜனதா ஈடுபட்டுள்ளது.

சிவசேனாவின் நிறுவன தலைவரான பால்தாக்கரேக்கு நினைவு மண்டபம் கட்ட ரூ.100 கோடியை ஒதுக்கி மராட்டிய மந்திரி சபை ஒப்புதல் அளித்துள்ளது. #ShivSena  #PMModi #BJP

சென்னை:

சென்னையில் தி.மு.க. தலைவர் மு.க.ஸ்டாலினை அவரது இல்லத்தில் சந்தித்து பேசி விட்டு வெளியே வந்த ஆந்திர முதல்-மந்திரி சந்திரபாபு நாயுடு நிருபர்களிடம் கூறியதாவது:-

ஜனநாயகத்தை காப்பாற்ற மு.க.ஸ்டாலினிடம் வேண்டுகோள் விடுத்தேன். அமலாக்கத்துறை, வருமான வரித்துறை போன்ற துறைகளை மத்திய பா.ஜ.க. அரசு எதிர்க் கட்சியினரை துன்புறுத்தவே பயன்படுத்துகிறது. ரிசர்வ் வங்கி உள்பட எந்த அமைப்பும் பாதுகாப்பாக இல்லை. இந்தியாவில் பொருளாதாரம் மந்தமான நிலையில் உள்ளது.



பணமதிப்பு நீக்க நடவடிக்கையால் எதுவும் நடக்கவில்லை. இதன்மூலம் கருப்பு பணத்தை ஒழிக்க முடியவில்லை என்று மத்திய நிதி மந்திரி ஒத்துக்கொண்டுள்ளார். அதேவேளையில் வருமான வரி ஏய்ப்பில் ஈடுபடுவர் கள் கட்டுப்படுத்தப்பட்டுள்ளதாக அவர் கூறி உள்ளார்.

நாட்டில் ஜனநாயகம் இல்லை. பல ஆயிரம் கோடி ரூபாய் கடன் பெற்ற விஜய்மல்லையா, நீரவ்மோடி ஆகியோர் இந்தியாவில் இருந்து தப்பித்து விட்டனர். வாராக்கடனால் பல வங்கிகள் திவால் ஆகி விட்டன. மத்திய அரசு மீது மக்கள் நம்பிக்கையை இழந்துள்ளனர்.

இந்த நாட்டை பா.ஜ.க. விடம் இருந்து காப்பாற்ற வேண்டியது உள்ளது. இதற் காக பா.ஜ.க.வுக்கு எதிரான அரசியல் கட்சியினரை அணி திரட்டி வருகிறோம். கர்நாடக முதல்-மந்திரி குமாரசாமியை சந்தித்து பேசினேன். மேற்கு வங்க முதல்-மந்திரி மம்தா பானர்ஜியை விரைவில் சந்திக்க உள்ளேன்.

பா.ஜ.க.வுக்கு எதிரான எண்ணம் கொண்டவர்கள் ஒற்றுமையாக உள்ளோம். எங்களிடம் எந்த கருத்து வேறுபாடும் ஏற்படாது என்ற நம்பிக்கை உள்ளது. ஒவ்வொருவரிடம் ஒவ்வொரு கருத்து இருந்தாலும் ஜனநாயகத்தையும், நாட்டையும் காப்பாற்றும் எண்ணம் தான் முதன்மையாக இருக்கும்.

இந்த நாட்டை காப்பாற்ற ஒரே எண்ணத்தோடு பயணம் செய்ய முடிவெடுத்துதான் அணி திரண்டு வருகிறோம். என்னை முன்னிலைப்படுத்த வேண்டும் என்ற எண்ணம் என்னிடம் இல்லை. நான் பிரதமர் வேட்பாளர் அல்ல. எங்கள் அணியில் பலம் வாய்ந்த தலைவர்கள் பலர் உள்ளனர்.

மோடியை விட மு.க.ஸ்டாலின் சிறந்த நிர்வாகிதான். பா.ஜ.க.வுக்கு எதிரான அணியை இணைப்பது மட்டும் தான் எனது பணி. இந்த அணியை யார் வழி நடத்துவார்கள் என்பதை அனைவரும் சேர்ந்து முடிவு செய்வோம்.

தமிழகத்தில் அரசு செயல் படுவதாக தெரியவில்லை. டெல்லியில் இருந்து தான் தமிழகத்தை இயக்குகிறார்கள். அரசியலை தவிர்த்து கிருஷ்ணாநதிநீர், கோதாவரி நீர் ஆகியவற்றை தமிழகத்துக்கு வழங்குவது குறித்தும் மு.க. ஸ்டாலினிடம் பேசினேன்.

இவ்வாறு சந்திரபாபு நாயுடு கூறினார். 

புதுடெல்லி:

பாராளுமன்றத்துக்கு அடுத்த ஆண்டு (2019) ஏப்ரல்-மே மாதங்களில் தேர்தல் நடைபெற உள்ளது.

இந்த தேர்தலுக்கான அட்டவணை பிப்ரவரி மாதம் வெளியாகும் என்று எதிர்பார்க்கப்படுகிறது. அதற்கு இன்னும் 7 மாதங்களே இருப்பதால் தேர்தல் பணிகளை அனைத்துக் கட்சிகளும் இப்போதே தொடங்கி விட்டன.

பாரதிய ஜனதா கட்சி 29 மாநிலங்களில் தனது முதல் கட்ட ஆய்வை முடித்து பிரசாரத்தை தொடங்கி விட்டது. அடுத்த மாதம் முதல் மோடியும், அமித்ஷாவும் பா.ஜ.க. மூத்த தலைவர்களும் மாநிலம் வாரியாக சுற்றுப்பயணத்தை அதிகப்படுத்த உள்ளனர்.

இதற்கிடையே கடந்த வாரம் பாராளுமன்றத்தில் நடந்த மோடி அரசின் மீதான நம்பிக்கையில்லா தீர்மானத்தில் கலந்து கொண்டு பேசிய ராகுல் காந்தி மிக ஆவேசமாக பேசினார். மோடி மீதும், மோடி அரசு மீதும் பல்வேறு குற்றச்சாட்டுகளை சரமாரியாக பட்டாசு வெடிப்பது போல் வெடித்து தீர்த்தார்.

ராகுலின் அந்த ஆவேச பேச்சு அவர் மீதான இமேஜை நாடு முழுவதும் கணிசமான அளவுக்கு உயர்த்தி உள்ளது. மோடிக்கு நிகரான போட்டியாளராக ராகுல் தன்னை உயர்த்திக் கொண்டு இருப்பதாக பல்வேறு தரப்பினரும் புகழாரம் சூட்டினார்கள். இதையடுத்து மறுநாளே நடந்த காங்கிரஸ் செயற்குழு கூட்டத்தில் ராகுலை முன்னிறுத்தி தேர்தலை சந்திக்க முடிவு செய்யப்பட்டது.

அதோடு மட்டுமின்றி கூட்டணி பேச்சுவார்த்தை, வேட்பாளர் தேர்வு உள்ளிட்ட அனைத்து வி‌ஷயங்களிலும் முடிவை எடுக்கும் அதிகாரம் ராகுலுக்கு கொடுத்து செயற்குழு கூட்டத்தில் தீர்மானிக்கப்பட்டது. இதன் தொடர்ச்சியாக காங்கிரசுடன் நட்பாக உள்ள தோழமை கட்சிகளும் ராகுலின் தலைமையை ஏற்க முன்வரும் என்று எதிர்பார்க்கப்பட்டது.

ஆனால் தேவேகவுடாவின் மதசார்பற்ற ஜனதா தளம் கட்சியை தவிர வேறு எந்த கட்சியும் ராகுலுக்கு ஆதரவு தெரிவிக்கவில்லை. ராகுலை பிரதமர் வேட்பாளராக ஏற்பதற்கு மாநிலங்களில் வலுவாக உள்ள கட்சிகள் தயங்குவதாக தெரிய வந்துள்ளது.

திரிணாமுல் காங்கிரஸ் மம்தா பானர்ஜி தனி அணியை தனது தலைமையில் தொடங்கி உள்ளார். இந்த அணி சார்பில் அடுத்த மாதம் 19-ந்தேதி கொல்கத்தாவில் பிரமாண்டமான பேரணி நடைபெற உள்ளது. அதில் அவர் பாராளுமன்ற தேர்தலுக்கான அறிவிப்பை வெளியிட திட்டமிட்டுள்ளார். இதன் மூலம் மம்தா பானர்ஜி காங்கிரசுடன் ஒத்து வருவாரா? என்ற சந்தேகம் நிலவுகிறது.

பகுஜன்சமாஜ் கட்சி தலைவரான மாயாவதியும் ராகுலை தலைவராக ஏற்க தயங்குகிறார். மேலும் காங்கிரசை விட அதிக இடங்களில் தனது கட்சி போட்டியிட வேண்டும் என்பதில் உறுதியாக உள்ளார். உத்தரபிரதேசத்தில் சமாஜ்வாடி கட்சியுடன் கை கோர்த்துள்ள மாயாவதி காங்கிரசுக்கு 8 இடங்கள் மட்டுமே கொடுக்க முடியும் என்று கூறியிருப்பது சலசலப்பை ஏற்படுத்தி இருக்கிறது.

அதுபோல சமாஜ்வாடி கட்சி தலைவர் அகிலேஷ் யாதவும் ராகுலை கூட்டணி தலைவராக ஏற்றுக் கொள்வீர்களா? என்ற கேள்விக்கு இதுவரை நேரடி பதிலை அளிக்கவில்லை. அவரும் காங்கிரசுக்கு அதிக இடங்களை கொடுக்க விரும்பவில்லை. இதனால் 80 எம்.பி. தொகுதிகளை கொண்டுள்ள உத்தரபிரதேசத்தில் காங்கிரஸ் கட்சி ஒற்றை இலக்கத்தில் போட்டியிட வேண்டிய துரதிருஷ்டம் ஏற்படுமோ? என்ற நிலை நிலவுகிறது.

உத்தரபிரதேசத்துக்கு அடுத்தபடியாக அதிக எம்.பி.க்களை வைத்துள்ள பீகாரிலும் காங்கிரஸ் தலைமையை ஏற்க லாலு பிரசாத் மகன்கள் தயங்குகிறார்கள். தங்களது தலைமையை காங்கிரஸ் ஏற்க வேண்டும் என்று கூறி வருகிறார்கள்.

இந்த நிலையில் சரத்பவார் தனியாக ஒரு கூட்டணியை உருவாக்கும் முயற்சிகளில் ஈடுபட்டுள்ளார். அதுபோல தேவேகவுடாவும் ராகுலை ஆதரிக்கும் முடிவில் ஊசலாட்டமான மனநிலைக்கு வந்திருப்பதாக கூறப்படுகிறது.

பா.ஜ.க.வுடன் உறவை முறித்துக் கொண்டுள்ள தெலுங்கு தேசம், சிவசேனா கட்சிகள் காங்கிரசை ஆதரிக்குமா? என்பதில் கேள்விக்குறி எழுந்துள்ளது. அதுபோல தெலுங்கானா ராஷ்டீரிய சமிதி, பிஜு ஜனதா தளம் மற்றும் வட கிழக்கு மாநிலங்களில் உள்ள சிறு கட்சிகளும் காங்கிரசுக்கு எதிரான நிலைப்பாட்டிலேயே இருக்கின்றன.

இத்தகைய சூழ்நிலையில் மாநில கட்சிகள் உதவி இல்லாமல் பாராளுமன்ற தேர்தலில் பா.ஜ.க.வை வீழ்த்த முடியாது என்ற நிர்ப்பந்தம் காங்கிரஸ் கட்சிக்கு ஏற்பட்டுள்ளது. எனவே ராகுலை முன் நிறுத்தும் முடிவை காங்கிரஸ் கட்சி மாற்றிக் கொண்டுள்ளது.

அதன்படி மாநில கட்சியைச் சேர்ந்த ஒருவரை பிரதமர் வேட்பாளராக முன்நிறுத்த காங்கிரஸ் கட்சி முடிவு செய்து இருப்பதாக தெரிய வந்துள்ளது. குறிப்பாக மாநில கட்சியின் பெண் தலைவரை பிரதமர் வேட்பாளராக ஏற்க காங்கிரசில் ஒருமித்த கருத்து உருவாகி இருப்பதாக கூறப்படுகிறது.

இதுபற்றி காங்கிரஸ் மூத்த தலைவர்களில் சிலர் கூறுகையில், “ஆர்.எஸ்.எஸ். பின்னணி இல்லாதவர் பிரதமர் வேட்பாளராக இருந்தால் அதை நாங்கள் ஏற்போம். இதற்காக நாங்கள் மெகா கூட்டணியை அமைக்க தயாராக இருக்கிறோம்” என்றனர்.

பிரதமர் பதவியையே விட்டுக் கொடுக்க காங்கிரஸ் மூத்த தலைவர்கள் முன் வந்திருப்பது மாநில கட்சி தலைவர்களிடம் ஆச்சரியத்தை ஏற்படுத்தி உள்ளது. இதையடுத்து பிரதமர் வேட்பாளர் யார் என்ற பேச்சு எழுந்துள்ளது.

அநேகமாக பகுஜன் சமாஜ் கட்சி தலைவர் மாயாவதி அல்லது திரிணாமுல் காங்கிரஸ் தலைவர் மம்தா பானர்ஜி ஆகிய இருவரில் ஒருவரை காங்கிரஸ் முன்னிறுத்தி மெகா கூட்டணியை அமைக்கும் என்று கூறப்படுகிறது.

மம்தா பானர்ஜி பிரதமர் வேட்பாளராக நிறுத்தப்பட்டால் அவருக்கு சிவசேனா, தெலுங்கு தேசம், தெலுங்கானா ராஷ்டீரிய சமிதி, பிஜு ஜனதாதளம் மற்றும் வடகிழக்கு மாநில கட்சிகளின் ஒட்டு மொத்த ஆதரவை பெற முடியும் என்றும் அதன் மூலம் பா.ஜ.க.வை வீழ்த்த முடியும் என்றும் காங்கிரஸ் தலைவர்கள் கருதுகிறார்கள்.

ஆனால் இந்த திட்டம் முழு வடிவம் பெறுமா? என்பதிலும் சந்தேகம் எழுந்துள்ளது. #ParliamentElection #Congress #RahulGandhi